LEES begin by LUISTER

Deur Melodie de Jager

Hoeveel keer moet jy ‘n versoek of opdrag herhaal voordat jou kind reageer? Een keer? Drie keer? Sewe keer, en dan kry jy nog ‘n ugh? asof jy nie ‘n woord gesê het nie?

 

 

Wanneer jou frustrasie en desibelvlakke dikwels eskaleer tot skreevlak, is dit dalk tyd om jou kind se gehoor te laat toets. Gehoorprobleme kan lei tot swak luistervaardighede en dus tot lees- en leerprobleme.

Dan is daar houding. Houding het ‘n groot impak op aandag, konsentrasie en luister. Voor mens ʼn kind aanvat oor hul houding, is dit  ʼn wyse stap om enige fisiese redes vir swak luistervaardighede uit te sluit.

Fisiese redes kan dalk as gevolg van gehoorverlies wees, maar dit kan ook as gevolg van swak sensoriese integrasie wees omdat die kind se vestibulêre sisteem onvolwasse is. Die vestibulêre stelsel sluit die blou buise in, wat net voor die blou slakagtige struktuur in die skets is. Die slakagtige struktuur is die gehoorapparaat (koglea) en ontvang klank via die vestibulêre sisteem.

 

 

Wanneer ‘n kind vir ‘n ouderdomsgeskikte tyd kan regop sit, nie slap-sit of lê nie, is die vestibulêre sisteem waarskynlik volwasse genoeg om nie ouditiewe insette te ontwrig nie.

‘n Vinnige toets om vas te stel of jou kind se vestibulêre stelsel volwasse genoeg is:

 

1-jarige                 kan vir 1 minuut op ‘n aktiwiteit konsentreer

2-jarige                 kan vir 2 minute op ‘n aktiwiteit konsentreer

3-jarige                 kan vir 3 minute op ‘n aktiwiteit konsentreer

4-jarige                 kan vir 4 minute op ‘n aktiwiteit konsentreer

5-jarige                 kan vir 5 minute op ‘n aktiwiteit konsentreer

6-jarige                 kan vir 6+5 minute op ‘n aktiwiteit konsentreer = 11 minute

7-jarige                 kan vir 7+5 minute konsentreer op ‘n aktiwiteit = 12 minute

8-jarige                 kan vir 8+5 minute konsentreer op ‘n aktiwiteit = 13 minute

 

Wanneer ‘n kind hul postuur en konsentrasie-ouderdom gepas kan handhaaf, is ‘n onvolwasse vestibulêre sisteem moontlik uitgesluit as ‘n fisiese bydraer tot swak luistervaardighede. Swak luistervaardighede kan dalk weens gehoorverlies wees.

 

 

KONDUKTIEWE GEHOORVERLIES is as gevolg van probleme met klank wat vanaf die oorskulp na die koglea gelei word. Gehoorverlies by kinders is meestal as gevolg van gereelde middeloorinfeksies of ‘n opbou van vloeistof in die middeloor. Oorinfeksies word dikwels opgeklaar sonder om enige skade te veroorsaak, maar as dit lank duur of herhaaldelik voorkom, kan die middeloor beskadig word en gehoorverlies voor kom. Geleidende gehoorverlies kan dikwels medies of chirurgies behandel word.

80% van alle leerprobleme is as gevolg van herhalende oorinfeksies.

Dr Carla Hannaford

SENSORINEURELE GEHOORVERLIES kan wees as gevolg van skade aan die haarselle in die binneoor. Wanneer haarselle beskadig word, kan hulle nie meer klankgolwe in elektriese impulse omskakel nie. Sonder hierdie impulse bereik klank nie die brein nie en kan die kind jou nie hoor nie.

Die gehoorsenuwee wat elektriese impulse van die ore na die brein dra, kan beskadig wees, en dan word goeie kwaliteit klank verhoed om die brein te bereik. Wanneer ʼn kind skade aan (1)haarselle of die (2)gehoorsenuwee het mag ‘n gehoortoestel of ondersteunende luistertoestel nodig wees om vir die skade te vergoed.

In ons ervaring by die Mind Moves Instituut het swak luister, konsentrasie en lees dikwels hul wortels in ‘n onvolwasse vestibulêre sisteem en/of gehoor. Dit word sterk aanbeveel dat jy gereeld jou kind se gehoor laat toets om ’n goeie verhouding met jou kind te verseker en leer aan te wakker.

Mind Moves vir Luister:

1. Mind Moves Nekversterker:

Dink aan die ruggraat as ‘n string krale. Trek die denkbeeldige toutjie bo die kop sodat die krale reguit ondertoe hang. Plaas die handpalm teen die voorkop en oefen ferm druk uit vir agt tellings. Onthou om asem te haal. Herhaal die proses met die palm teen die agterkant, die linkerkant en die regterkant van die kop. Gebruik eers die een hand en dan die ander. Hierdie oefening versterk en ontspan die nek- en skouerspiere om die kopbeweging van die liggaamsbeweging te skei en inhibeer sodoende die TLR. Dit verbeter ook die liggaamshouding, luistervaardighede, balans en spiertonus.

2. Mind Moves Temporale Tikkies:

Begin voor die ore en tik liggies met albei hande opwaarts rondom die ore. Hierdie oefening bevorder stimulasie van die temporale lob ten einde luistervaardighede, ouditiewe prosessering, vestibulêre stimulasie, propriosepsie en balans te bevorder. Dit verbeter ook integrasie tussen luister en sowel mondelinge as skriftelike kommunikasie.